Chelsea á toppinn eftir auðveldan sigur á WBA

Chelsea vann í kvöld tíunda útisigur sinn í röð í ensku úrvalsdeildinni þegar liðið vann auðveldan 3-0 útisigur á botnliði West Brom.

Jose Bosingwa kom Chelsea á bragðið og Nicolas Anelka gerði út um leikinn með tveimur mörkum fyrir hlé. Hann er markahæsti leikmaður úrvalsdeildarinnar.

Chelsea er þar með komið á toppinn á ný þar sem það hefur hlotið 32 stig líkt og Liverpool. Manchester United er í þriðja sæti með 24 stig og Arsenal og Aston Villa í fjórða og fimmta með 23 stig.

West Brom er á botninum með aðeins 11 stig úr 13 leikjum, Tottenham þar fyrir ofan með 12 stig og Blackburn, Newcastle, Manchester City og Wigan hafa öll 13 stig.