Allan Dyring að flytja til Danmerkur

Allan Dyring hefur leikið sinn síðasta knattspyrnuleik á Íslandi en hann mun í vikunni flytja aftur til Danmerkur með fjölskyldu sinni.

Þetta staðfesti hann í samtali við Vísi en fyrr í haust var greint frá því að hann yrði ekki í herbúðum Fylkis áfram. Hann kom til Fylkis fyrir tímabilið frá FH þar sem hann var í tvö ár.

„Við áttum engra annarra kosta völ en að flytja aftur heim. Efnahagsástandið hér er afar slæmt og þetta er frekar leiður endir á Íslandsdvöl okkar," sagði Dyring.

Hann fluttist hingað til lands haustið 2005 og segir að sér hafi líkað lífið afar vel á Íslandi. „Okkur leið alveg gríðarlega vel á Íslandi og við munum sakna allra hér."

Dyring viðurkennir þó að hann hafi aldrei náð sér almennilega á strik á knattspyrnuvellinum hér á landi. „Þetta varð aldrei eins og ég hafði vonast til," sagði Dyring. „Þetta var erfitt, vissulega."

Hann mun semja við sitt gamla lið í Danmörku, Fredericia, fyrst um sinn en ætlar að taka því rólega fram eftir vetri. „Ég ætla að koma mér vel fyrir með fjölskyldunni og svo verðu bara að koma í ljós hvað verður, hvort ég verði áfram í Fredericia eða fari í annað lið."

Dyring lék átján deildarleiki með FH þau tvö tímabil sem hann var þar og skoraði í þeim fjögur mörk. Hann lék svo sextán deildarleiki með Fylki í sumar.