Litlar breytingar á leikmannahópi FH

Útlit er fyrir að litlar breytingar verði á leikmannahópi FH fyrir næsta keppnistímabil. Þó er ekki búið að ganga frá samningum við Dennis Siim og Jónas Grana Garðarsson.

Fjöldi leikmanna voru að renna út á samningi og hefur meirihluti þeirra samið um að vera áfram í herbúðum FH. Meðal þeirra eru Atli Guðnason, Atli Viðar Björnsson, Guðmundur Sævarsson, Gunnar Sigurðsson, Matthías Vilhjálmsson og Tommy Nielsen. Allt eru þetta leikmenn sem komu reglulega við sögu hjá FH í sumar.

Heimir Guðjónsson, þjálfari FH, staðfesti þetta í samtali við Vísi í morgun. Hann sagði góðar líkur á því að Siim yrði áfram og þá sagði Jónas Grani sjálfur í samtali við Vísi í haust að hann yrði mjög líklega áfram hjá FH.

Heimir sagði enn fremur að samningaviðræður hafi gengið vel. „Þetta eru allt leikmenn sem vilja vera í sigurliði," sagði hann.