Ancelotti sagður hafa fundað með Abramovich

Ítalska dagblaðið La Repubblica greinir frá því í dag að þeir Roman Abramovich, eigandi Chelsea, og Carlo Ancelotti, knattspyrnustjóri AC Milan, hafi fundað í Sviss.

Blaðið segir að sést hafi til þeirra í Genf í Sviss en Chelsea er nú á höttunum eftir nýjum knattspyrnustjóra eftir að Avram Grant var látinn fara um helgina.

Ancelotti segir hins vegar að hann sé staddur í Sviss í fríi. „Ég er hér í fríi svo ég geti slakað á," sagði Ancelotti. „Abramovich? Ég þekki hann nú lítið og í sannleika sagt er ég aðeins að hugsa um Milan og ekkert annað."

AC Milan gekk alls ekki vel á leiktíðinni og er Marcello Lippi, fyrrum landsliðsþjálfari Ítalíu, orðaður við stjórastöðuna hjá félaginu.