Terry fyrirliði Englands á morgun

John Terry verður fyrirliði enska landsliðsins á morgun er það tekur á móti Bandaríkjamönnum í vináttulandsleik á Wembley.

Fabio Capello, landsliðsþjálfari Englands, hefur ákveðið að skipta fyrirliðahlutverkinu á milli manna þar til undankeppni HM 2010 hefst í haust. Þá mun hann útnefna framtíðarfyrirliða landsliðsins.

Capello sagði að þetta væru góðar fréttir fyrir Terry eftir að hann misnotaði spyrnu sína í vítaspyrnukeppni í úrslitaleik Chelsea og Manchester United í Meistaradeild Evrópu í síðustu viku. United varð meistari og Terry var óhuggandi eftir leikinn.

„Hann hefur spilað mjög vel á æfingum og þegar ég sagði honum að hann yrði fyrirliði í leiknum varð hann mjög ánægður. Sem fyrirliði er mikilvægt að vera leiðtogi en það er John Terry svo sannarlega."

Steven Gerrard og Rio Ferdinand hafa borið fyrirliðabandið í þeim tveimur leikjum enska landsliðsins þar sem Capello hefur stýrt liðinu.