Anelka átti að taka fimmtu spyrnuna

Franski framherjinn Nicolas Anelka hefur viðurkennt að hann hafi neitað að taka eina af fimm fyrstu vítaspyrnum Chelsea í úrslitaleik Meistaradeildarinnar á dögunum.

Það kom í hlut John Terry fyrirliða að taka fimmtu spyrnu Chelsea gegn Manchester United, en í stað þess að tryggja liði sínu Evrópumeistaratitilinn, rann hann í grasinu og skaut í stöng.

Það var svo Anelka sem gerði út um vonir Chelsea þegar hann lét Edwin van der Sar verja frá sér í bráðabananum. Anelka tjáði sig um málið í samtali við The Sun.

"Ég var beðinn að taka eina af fimm fyrstu spyrnunum, en ég sagði að það væri útilokað. Ég var nýkominn inn á völlinn og var svo að segja að spila stöðu hægri bakvarðar - og svo vilja menn að ég fari beint á vítapunktinn. Ég þurfti því að taka sjöundu spyrnuna og Edwin van der Sar varði hana - flott fyrir hann, svona er fótboltinn," sagði Anelka, sem þótti ákvörðun þjálfarans að setja hann inn á völlinn í framlengingunni einkennileg.

"Mér datt aldrei í hug að ég ætti eftir að koma við sögu í þessum leik. Ég var á bekknum í 110 mínútur og allt í einu er ég beðinn að spila. Ég var ekki búinn að hita upp í eina mínútu. Ég er ekki viss um að þetta hafi komið fyrir í úrslitaleik Meistaradeildarinnar áður. Menn verða að vera búnir að hita upp áður en þeir koma inn í svona baráttuleik," sagði Frakkinn.