Jackson og Sneholm fara frá Þrótti

Hvorki Jesper Sneholm né Michael Jackson munu leika með Þrótti á næstkomandi tímabili. Dennis Danry verður hins vegar áfram hjá félaginu.

Þetta staðfesti Gunnar Oddsson, þjálfari Þróttar, í samtali við Vísi í dag. „Það er alveg borðleggjandi að þeir Jesper og Michael verða ekki áfram," sagði Gunnar. „Við náðum hins vegar að semja við Dennis upp á nýtt og hann verður áfram hjá okkur."

Þróttur hefur eins og önnur þurft að endurskoða sína leikmannasamninga þar sem rekstarumhverfi hefur breyst mikið að undanförnu.

Michael Jackson var á sínu öðru ári með Þrótti en hann hefur spilað stórt hlutverk í varnarleik liðsins. Hann lék 20 leik með liðinu í 1. deildinni í fyrra og 21 í Landsbankadeildinni í sumar en hann skoraði í þeim tvö mörk.

Sneholm kom til Þróttar í júlí í sumar og lék alls ellefu leiki með liðinu í deildinni í sumar og skoraði í þeim eitt mark.

Danry lék með Þrótti í allt sumar og skoraði fjögur mörk í nítján leikjum.

Alls voru fimm erlendir leikmenn með Þrótti í sumar en Brasilíumennirnir Carlos Alexander Bernal og Ismael Silva Francisco eru þegar farnir frá félaginu.

Hins vegar hefur Rafn Andri Haraldsson framlengt samning sinn við Þrótt um eitt ár. Óvíst er hvort að markvörðurinn Bjarki Freyr Guðmundsson verði áfram með hjá félaginu en Gunnar sagði að viðræður í gangi við Bjarka.