Tímaeyðsla að reyna við Ronaldo

Carlos Queiroz, aðstoðarstjóri Englandsmeistara Manchester United, segir að það sé tímaeyðsla hjá spænska liðinu Real Madrid í að reyna að krækja í Cristiano Ronaldo.

Ronaldo er af flestum talinn besti knattspyrnumaður heims en Queiroz segir að 100 milljónir punda dugi ekki einu sinni til að krækja í kantmanninn portúgalska. Real Madrid hefur lengi horft löngunaraugum til hans.

„Það er hægt að reyna að bjóða allan pening í heimi í hann en hann er einfaldlega ekki til sölu," sagði Queiroz.