Synjun lögreglu vísað til úrskurðarnefndar um upplýsingamál

Vísir.is hefur beðið úrskurðarnefnd um upplýsingamál að fjalla um synjun Lögreglustjórans á Höfuðborgasvæðinu á beiðni Vísis um að fá upplýsingar um hversu mörg mál embættið hefur látið niður falla á þessu ári.

Vísir hefur fengið þær upplýsingar frá Ríkissaksóknara að lögreglan á Höfuðborgarsvæðinu hafi hætt rannsókn á um 700 málum í allsherjar tiltekt í málskrá sinni í byrjun þessa árs.

Stefán Eiríksson lögreglustjóri neitar að staðfesta þessa tölu en hann hefur einnig neitað að verða við ósk Vísis um að taka saman upplýsingar um málið.

Beiðni Vísis um að fá nákvæmar og sundurliðaðar upplýsingar um hversu mörg mál voru látin niður falla var hafnað.

Í svörum Stefáns og starfsmanna hans við ítrekuðum beiðnum Vísis um upplýsingar er því haldið fram að það sé of flókið mál að taka saman þau gögn sem Vísir hefur óskað eftir.

Það hefur meðal annars verið nefnt að tölvukerfi embættisins bjóði ekki upp á þann möguleika. Vísir sættir sig ekki við þessi svör og hefur því farið fram á að úrskurðarnefnd um upplýsingamál fjalli um málið og skeri úr um lögmæti synjunar Stefáns og embættis hans.