FIFA samþykkir nýjan formann Pólverja

Alþjóða knattspyrnusambandið hefur nú lagt blessun sína yfir nýkjörinn formann pólska knattspyrnusambandsins sem fengið verður að taka á meintri spillingu í pólska boltanum.

Grzegorz Lato hefur verið kjörinn formaður pólska knattspyrnusambandsins en hann er fyrrum landsliðsmaður og var markahæsti leikmaður HM árið 1974. Hann fékk 57 af 112 atkvæðum í kjörinu þar sem FIFA fylgdist vel með framvindu mála.

Kosningarnar voru haldnar sem hluti af samkomulagi FIFA og pólsku ríkisstjórnarinnar, en FIFA hafði hótað að beita Pólverja aðgerðum ef þeir löguðu ekki til í knattspyrnumálum sínum.

FIFA hótaði því að draga liðið úr keppni í undankeppni HM 2010 og taka EM 2012 af sambandinu en sú keppni fer fram í Póllandi og Úkraínu.

Pólska ríkisstjórnin hafði áður skipað stjórn pólska knattspyrnusambandsins að segja af sér, en hvorki FIFA né Knattspyrnusamband Evrópu líða afskipti stjórnvalda af knattspyrnuforystu aðildarlanda sinna.