Ballack vill ljúka ferlinum hjá Chelsea

Michael Ballack segir að hann vilji klára feril sinn hjá Chelsea í Englandi.

„Ég hef spilað nógu lengi í Þýskalandi og get vel ímyndað mér að klára feril minn í Englandi með Chelsea. Við höfum ekki rætt þetta enn en ég vil einbeita mér að fullu að EM í fótbolta. Eftir að þeirri keppni lýkur munum við ræða þetta," sagði Ballack.

Hann átti góðu gengi að fagna undir lok tímabilsins og þótti spila betur þá en hann hafði nokkru sinni gert síðan hann gekk til liðs við Chelsea frá Bayern München árið 2006.

Ballack er 31 árs gamall og lék í þrettán ár í heimalandi sínu með Kaiserslautern, Bayer Leverkusen og Bayern. Hann á að baki 81 landsleik með Þýskalandi.