Giovani segist á leið til Tottenham

Giovani Dos Santos mun að öllum líkindum leika fyrir Tottenham á næsta tímabili. Hann segir aðalástæðu þess vera knattspyrnustjóri liðsins, Juande Ramos.

Barcelona og Tottenham hafa komist að samkomulagi um kaupverðið en það eru tæpar fimm milljónir punda. Giovani var talinn einn efnilegasti leikmaður Börsunga fyrir tveimur árum.

„Ég mun spila fyrir Tottenham næsta tímabil," sagði leikmaðurinn í viðtali. Eftir að faðir hans og umboðsmaður heimtaði launahækkun fyrir son sinn þá gaf Barcelona þau skilaboð að Giovani þyrfti að bæta frammistöðu sína á vellinum til að verðskulda það.

Fleiri lið sýndu áhuga á að fá Giovani til sín en Ramos er aðalástæða þess að hann velur Tottenham.