Maradona hótar að hætta

Diego Maradona hefur hótað að segja af sér sem landsliðsþjálfari Argentínu ef knattspyrnusambandið í landinu hætti ekki að skipta sér af störfum hans.

Maradona er ósáttur við að fá ekki að ráða sér aðstoðarmenn af eigin óskalista, en yfirmaður knattspyrnusambandsins mun ekki hafa tekið vel í að Maradona réði Oscar Ruggeri sem hægri hönd sína.

Fyrsti leikur Maradona með landsliðið er æfingaleikur við Skota í Glasgow næsta miðvikudag, en hann var ráðinn landsliðsþjálfari þann 4. nóvember sl.

"Ég fer ekki til Glasgow nema ég fái það starfsfólk sem ég vil vinna með," sagði Maradona.