Frumvarp um sérstakan saksóknara lagt fram

Frumvarp til laga um embætti sérstaks saksóknara sem ætlað er að rannsaka grun um refsiverða háttsemi í aðdraganda og í tengslum við bankahrunið hefur verið lagt fram á Alþingi. Saksóknarinn skal samkvæmt frumvarpinu fullnægja skilyrðum til skipunar í embætti héraðsdómara og fær hann heimildir til þess að ráða til sín starfsfólk. Gert er ráð fyrir því að saksóknarinn verði skipaður svo fljótt sem auðið er eftir að frumvarpið hefur verið samþykkt en það var tekið fyrir í allsherjarnefnd Alþingis í morgun. Gert er ráð fyrir að embættið kosti 76 milljónir á ári miðað við níu starfsmenn en í þeirri tölu er erlend sérfræðiaðstoð ekki talin með.

Starfsmenn embættisins sem eru lögreglumenn eða löglærðir munu fara með lögregluvald og er gert ráð fyrir því að starfsmenn verði þrír til fjórir til að byrja með. Í athugasemdum við frumvarpið er gert rá fyrir því að starfsmenn verði orðnir tíu á árinu 2009. „Aðrir sérfræðingar embættisins hafa, samkvæmt nánari ákvörðun hins sérstaka saksóknara, heimildir til að annast skýrslutökur á rannsóknarstigi af sakborningum og vitnum. Hinn sérstaki saksóknari getur leitað til sérfróðra aðila, innlendra sem erlendra, eftir því sem þurfa þykir," segir í þriðju grein.

Eins og áður hefur verið greint frá inniheldur frumvarpið ákvæði sem kennt hefur verið við "litla Landsímamanninn." Í fjórðu grein frumvarpsins segir: „Ríkissaksóknara er heimilt að ákveða, að uppfylltum skilyrðum 2. mgr. og að fenginni rökstuddri tillögu frá hinum sérstaka saksóknara, að starfsmaður eða stjórnarmaður fyrirtækis, sem hefur frumkvæði að því að bjóða eða láta lögreglu eða saksóknara í té upplýsingar eða gögn sem tengjast fyrirtækinu, móður- eða dótturfyrirtæki þess eða fyrirtækjum sem það er í viðskiptum við eða stjórnendum þeirra, sæti ekki ákæru þótt upplýsingarnar eða gögnin leiði líkur að broti hans sjálfs."

Greinar frumvarpsins eru sjö, en í sjöttu grein er dómsmálaráðherra gert heimilt að leggja embættið niður hvenær sem er eftir 1. janúar 2010 og „hverfa þá verkefni þess til lögreglu eða ákærenda.."

Ekki er kostnaður við embættið tiltekinn í frumvarpinu en í umsögn frá fjármálaráðuneytinu kemur fram að erfitt sé að sjá fyrir hversu viðamikil verkefni embættisins verða en að dómsmálaráðuneytið hafi í rekstraráætlun fyrir embættið gert ráð fyrir því að miðað við níu starfsmenn kosti embættið 76 milljónir króna á ársgrundvelli. Þar er þó ekki tekin með í reikninginn aðstoð erlendra sérfræðinga né heldur málskostnað sem gæti fallið til komi til ákæru í málum.