Hetjunum fagnað í Hull

Yfir 100.000 stuðningsmenn Hull fylltu götur bæjarins í dag til að hylla hetjurnar sínar. Hull komst upp í úrvalsdeildina um helgina og leikmenn keyrðu um á þaklausum strætisvagni í dag.

„Aldrei gat ég í mínum villtustu draumum séð það gerast að ég kæmi aftur til Hull, heimabæjar míns, og myndi sjá þessa sjón," sagði Dean Windass en þessi 39 ára leikmaður skoraði sigurmarkið gegn Bristol City um helgina.

Það var ólýsanleg gleði sem ríkti í Hull í dag og nokkur gleðitár runnu niður kinnar. KC völlurinn, heimavöllur Hull, tekur 25.000 manns í sæti en stjórn félagsins ætlar að leita leiða til að stækka hann fyrir næsta tímabil.