Hiddink útilokar Chelsea

Guus Hiddink segir engar líkur á því að hann muni taka við knattspyrnustjórn Chelsea í sumar.

Hiddink hefur ítrekað verið orðaður við starfið en hann er landsliðsþjálfari Rússa og tengist mikið Roman Abramovich, rússneskum eiganda Chelsea.

Samningur Hiddink við rússneska knattspyrnusambandið rennur út eftir EM í sumar en hann hefur hins vegar gert munnlegt samkomulag við forseta sambandsins um að stýra liðinu fram yfir HM 2010.

„Þa´skiptir mig mestu máli að það ríkir samkomulag milli forsetans og mín," sagði Hiddink í samtali við BBC. „Ég hef ekki rætt við Chelsea um laust starf þar en ég er stundum í sambandi við Abramovich um stöðu mála í rússneskri knattspyrnu."

Hiddink sagði að lokum að hann telur að Frank Rijkaard gæti hentað Chelsea vel. Þeir þekkjast vel enda var Rijkaard aðstoðarmaður Hiddink er hann þjálfaði hollenska landsliðið á HM 1998.