Þriðji áfangi Hellisheiðarvirkjunar tekinn í notkun

Hanna Birna Kristjánsdóttir, borgarstjóri í Reykjavík, tók í dag formlega í notkun tvær nýjar vélasamstæður í Hellisheiðarvirkjun. Með því er afl virkjunarinnar orðið 213 megavött, sem gerir hana að þriðju aflmestu virkjun landsins í raforku. Fram kom hjá Hjörleifi B. Kvaran, forstjóra Orkuveitu Reykjavíkur, við athöfnina í dag að fullbúin verði virkjunin sú afkastamesta í landinu.

Í tilkynningu frá Orkuveitunni segir að fjöldi fólks, þar á meðal forseti Íslands, hafi verið viðstaddur þegar ræstar voru tvær 45 megavatta gufuaflstúrbínur í Hellisheiðarvirkjun. „Þetta er þriðji áfangi uppbyggingarinnar. Undir lok næsta árs hefst framleiðsla á heitu vatni í virkjuninni og árið 2010 er ráðgert að síðasti áfanginn í raforkuframleiðslu Hellisheiðarvirkjunar verði tekinn í notkun. Þá verður uppsett afl hennar í raforku 303 megavött og gert er ráð fyrir að afl heitavatnsframleiðslunnar verði aukið í nokkrum áföngum á næsta áratugum upp í 400 megavött. Þá verður hún aflmesta virkjun landsins," segir í tilkynningunni.

Auk borgarstjóra ávörpuðu samkomuna forstjóri og stjórnarformaður Orkuveitu Reykjavíkur og fulltrúar framleiðenda aflvélanna, Mitsubishi og Balcke Dürr. Verkefnin framundan í íslensku efnahagslífi voru þeim hugleikin að því er segir í tilkynningunni. „Borgarstjóri gerði að umtalsefni gott orðspor Íslendinga í orkumálum og hvernig það geti nýst þjóðinni til framdráttar við erfiðar aðstæður. Hún minnti á að margar grannþjóðir okkar þurfi að fást tvö stór verkefni um þessar mundir; efnahagssamdrátt og loftslagsmálin. Íslendingar hafi hinsvegar umbylt sínu orkukerfi á síðustu öld í átt til endurnýjanlegrar orku og séu enn að."

Guðlaugur G. Sverrisson, stjórnarformaður Orkuveitu Reykjavíkur, minntist þess í ávarpi sínu að það hafi verið í kreppunni á fjórða áratug síðustu aldar að markviss uppbygging hitaveitu hófst hér á landi í Reykjavík. Framsýni ráðamanna þá, væri að spara okkur 150 milljónir bandaríkjadala á ári í kyndikostnað. Værum við að nota olíu til húshitunar enn þann dag í dag, þyrftu íbúar höfuðborgarsvæðisins að greiða 55 milljónum króna meira í kyndikostnað á degi hverjum."

Jarðvarmavirkjanir Orkuveitu Reykjavíkur hafa verið byggðar í áföngum því samhliða orkunýtingu fást auknar upplýsingar um afkastagetu jarðhitageymisins sem nýttur er. Fljótlega eftir að markvissar rannsóknarboranir hófust við Kolviðarhól kom í ljós að svæðið býður upp meiri nýtingu en upphaflega var áformuð.