Hefðum átt að klára Arsenal í fyrri hálfleik

Martin O´Neill stjóri Aston Villa var að vonum ánægður með sína menn eftir 2-0 sigur þeirra á Arsenal á útivelli í dag. Þetta var fyrsti sigur Villa á Arsenal á útivelli síðan 1993.

"Liðið hefur verið að spila þokkalega en ef tekið er mið af mótherjanum í dag og þeirri staðreynd að við höfðum tapað tveimur leikjum nýlega - verð ég að segja að þetta var frábær frammistaða," sagði O´Neill.

"Við sóttum hart að Arsenal í fyrri hálfleik og hefðum átt að klára leikinn fyrir hlé á miðað við vítið sem fór forgörðum og færin sem við fengum til að skora. Við spiluðum frábæran bolta og áttum skilið að vinna í dag," sagði stjórinn.