Keisarinn tippar á Ítali - Capello á Þjóðverja

Þýska goðsögnin Franz Beckenbauer tippar á að heimsmeistarar Ítala muni fylgja eftir sigrinum á HM 2006 með því að verða Evrópumeistarar í sumar.

Beckenbauer telur þó að hans menn Þjóðverjar verði erfiðir viðureignar á mótinu. "Ég hef ekki trú á að við eigum eftir að sjá öskubuskulið vinna keppnina eins og 2004 þegar Grikkir unnu. Það verður líklega eitt af stóru liðunum og ég hugsa að Ítalir séu sigurstranglegir - jafnvel án fyrirliðans Cannavaro. Þar á eftir myndi ég tippa á Holland eða Frakkland og svo kannski Spán og auðvitað Þýskaland," sagði "Keisarinn"

Fabio Capello, landsliðsþjálfari Englendinga, hefur hinsvegar tröllatrú á þýska landsliðinu að þessu sinni og bendir á að liðið sé nálægt því að spila á heimavelli.

"Þýskaland er eitt af þeim liðum sem mér finnast sigurstranglegast í keppninni. Svo koma Frakkland, Ítalía, Spánn og kannski Portúgal. Þýska liðið er sterkt og hugarfar Þjóðverjanna fleytir þeim jafnan langt. Það hjálpar þeim líka að mótið fer fram í Sviss og Austurríki, sem þýðir að liðið er nánast að spila á heimavelli. Þjóðverjarnir voru sterkir á HM og ég held að þeir séu betri núna," sagði Ítalinn.