Hagnast vel á síldveiði

Hásetahlutur á einu síldveiðiskipanna fór í 4,4 milljónir fyrir einn mánuð nýlega og er þetta hæsti skiptahlutur sem sögur fara af hérlendis. Hásetahlutur fyrir árið í heild stefnir í tuttugu milljónir króna á nokkrum skipanna.

Síldveiðiskip halda áfram að fylla sig á miðunum við Stykkishólm og í dag og sigldu Bjarni Ólafsson og Faxi með fullfermi til Austfjarðahafna, um 800 tonn hvort skip. Þegar saman fer góður afli og hátt aflaverð, ekki síst vegna gengis krónunnar, verða tekjurnar háar.

Fullfermi af síldarmiðunum á Breiðafirði þessa dagana skilar í hásetahlut um þrjú til fjögurhundruð þúsund krónum en veiðitúrinn með siglingu fram og til baka tekur um sex daga. Þótt þessar tekjur þyki almennt góðar eru þær litlar miðað við það sem fékkst í sumar á norsk-íslensku síldinni en þá var gríðarhátt verð á mjöli og lýsi. Stöð 2 hefur upplýsingar um að þegar best gekk hafi hásetahlutur á síldveiðiskipunum verið almennt frá tveimur og hálfri milljón króna og vel yfir fjórar milljónir króna í uppgjöri fyrir júlímánuð. Hæsti hásetahlutur, sem við höfum staðfestar upplýsingar um, er 4,4 milljónir króna fyrir júlímánuð en skipstjórahlutur, sem tveir menn deildu, var um 13 milljónir króna.

Reyndir skipstjórnarmenn, sem til þekkja, telja að þetta séu hæstu tekjur sem fengist hafi á íslenskum fiskiskipum fyrr og síðar. Einn skipstjórinn sagði reyndar að þetta ævintýri í sumar hafi verið svo sérstakt að það ætti aldrei eftir að endurtaka sig.