10 óvæntustu úrslit í sögu enska bikarsins

Lið Barnsley hefur náð að rita nafn sitt í sögubækurnar í enska bikarnum að undanförnu með því að slá út bæði Liverpool og Chelsea á leið sinni í undanúrslit keppninnar.

Breska blaðið Sun tók í tilefni af því saman lista yfir 10 af óvæntustu úrslitum í sögu þessarar sögufrægu bikarkeppni og til marks um afrek Barnsley liðsins komast báðir sigrar þess inn á listann.

10. West Ham 1 - Arsenal 0 (1980)

West Ham var síðasta liðið utan efstu deildar til að vinna enska bikarinn. Trevor Brooking var ekki þekktur fyrir að vera sérstakur skallamaður, skoraði sigurmarkið með skalla á Wembley og tryggði litla liðinu óvæntan sigur.

9. Sunderland 1 - Leeds 0 (1973)

Leeds liðið var handhafi bikarsins þetta árið og flestir spáðu því að liðið mundi endurtaka leikinn þegar það mætti B-deildarliði Sunderland í úrslitum. Annað kom hinsvegar á daginn og Ian Porterfield skoraði sigurmarkið um miðjan fyrri hálfleik. Markvörðurinn Jim Montgomery var hetja Sunderland í leiknum þegar hann varði ótrúlega frá Peter Lorimer og hindraði að Leeds jafnaði leikinn.

8. Bornemouth 2 - Man Utd 0 (1984)

Manchester United var ekki sama stórveldið á þessum tíma og það er í dag, en liðið var engu að síður ríkjandi bikarmeistari þegar það mætti C-deildarliði Bournemouth í þriðju umferð keppninnar. Þetta var aðeins fyrsti af mörgum glæstum bikarsigrum Harry Redknapp sem þjálfara á ferlinum, en hann var þá stjóri Bournemouth.

7. Colchester 3 - Leeds 2 (1971)

Leeds hafði komist í bikarúrslitaleikinn árin tvö á undan og lyfti bikarnum ári eftir þennan leik. Í fimmtu umferðinni 1971 upplifði liðið þó martröð þegar það var slegið út af D-deildarliði Colchester, sem komst í 3-0 í leiknum áður en Leeds náði að minnka muninn.

6. Liverpool 1 - Barnsley 2 (2008)

Það var í þessum leik sem ótrúleg bikarsyrpa Barnsley liðsins hófst í ár. Liverpool hvíldi nokkra af lykilmönnum sínum og það virtist ekki ætla að koma að sök þegar Dirk Kuyt kom þeim rauklæddu yfir í leiknum. Steve Foster jafnaði hinsvegar leikinn fyrir Barnsley og Brian Howard stimplaði nafn sitt í sögubækurnar með dramatísku sigurmarki á Anfield.

5. Barnsley 1 - Chelsea 0

Byrjunarlið Chelsea í leiknum kostaði hátt í 16 milljarða króna og innihélt stjörnur á borð við Michael Ballack og John Terry. Barnsley-mönnum var slétt sama um það og fylgdu eftir ótrúlegum sigri á Liverpool með því að slá Chelsea úr keppni. Kayode Odejayi skoraði sigurmarkið með skalla og tryggði Barnsley sæti í undanúrslitum keppninnar í fyrsta skipti síðan fyrir fyrri heimsstyrjöld.

4. Sutton 2 - Coventry 1 (1989)

Coventry var í sjötta sæti í efstu deild og hafði orðið bikarmeistari á Englandi aðeins tveimur árum áður. Liðinu var hinsvegar kippt hressilega niður á jörðina af áhugamönnunum í Sutton. Síðan þá hefur engu utandeildarliði tekist að slá út lið í efstu deild í keppninni.

3. Yeovil 2 - Sunderland 1 (1949)

Sunderland var í efstu deild og leitt áfram af hinum magnaða Len Shackleton. Liðið þurfti þó að sætta sig við að vera auðmýkt af utandeildarliðinu Yeovil í þokunni á Huish Park í fjórðu umferð bikarsins. Þetta er enn stærsta augnablik í sögu liðsins.

2. Wrexham 2 - Arsenal 1 (1992)

Arsenal varð enskur meistari leiktíðinna á undan, en Wrexham vermdi botnsætið í B-deildinni. Það hafði hinsvegar lítið að segja þegar þessi lið mættust í sígildum leik í þriðju umferðinni á Racecource, heimavelli Wrexham. Arsenal náði 1-0 forystu í leiknum en þeir Mickey Thomas og Steve Watkin tryggðu Wrexham ótrúlegan sigur.

1. Hereford 2 - Newcastle 1 (1972)

Utandeildarliðið Hereford gerði jafntefli við Newcastle á útivelli í fyrri leik liðanna í þriðju umferðinni þetta árið og lengi vel leit út fyrir sigur Newcastle í síðari leiknum. Markamaskínan Malcom Macdonald hafði komið Newcastle yfir í leiknum, en þrumufleygur Ronnie Radford jafnaði leikinn fyrir heimamenn.

Fagnaðarlætin sem brutust út eftir jöfnunarmarkið voru líkari óeirðum og fylltist völlurinn af áhorfendum á augabragði. Þegar tókst að rýma völlinn hélt leikur áfram og svo fór að lokum að Ricky George tryggði Hereford þennan sögulega sigur með marki í framlengingunni. Mark hans olli viðlíka tryllingi á vellinum, en upp úr stendur þrumufleygur Ronnie Radford - sannarlega eitt eftirminnilegasta mark í sögu enska boltans.