Blackburn gæti rekið Ince í vikunni

Blackburn tapaði í gær sjötta leiknum í röð í ensku úrvalsdeildinni í gær þegar það lá gegn Wigan og hefur ekki unnið sigur í síðustu ellefu leikjum.

Helgarblaðið News of the World á Englandi segir að dagar Paul Ince knattspyrnustjóra séu taldir hjá félaginu og fullyrðir að hann verði rekinn í vikunni.

Alan Shearer hefur verið orðaður við stjórastöðuna ef Ince verður rekinn.

Stuðningsmenn Blackburn sungu "þú verður rekinn í fyrramálið" þegar þeir horfðu upp á lið sitt tapa enn einum leiknum.

Ince sjálfur sagðist hafa fengið huggun í samtali sínu við stjóra Wigan, Steve Bruce í gær, en þeir léku saman með Manchester United um árabil.

"Ég mun halda áfram að berjast og það þýðir ekkert fyrir okkur að leggjast niður og grenja. Við fengum gott tækifæri til að rétta úr kútnum í gær en við brugðumst stuðningsmönnum okkar. Ég talaði við Steve Bruce eftir leikinn og hann sagði mér að hann hefði lent í þessu sama þegar hann var hjá Birmingham, en honum tókst að rétta liðið við," sagði Ince.