Stóra bakarísmálið: Lesendur tjá sig

Gísli Tryggvason, talsmaður neytenda, segir réttmætum spurningum varpað upp í umfjöllun Vísis um starfshætti bakaría og stórmakaða. Viðbrögð lesenda við fréttum um frosna kleinuhringi og pólsk brauð eru sterk.

"Þetta eru réttmætar spurningar hjá neytendum. Menn þurfa að nota rétt hugtök til að ekki sé villt um fyrir fólki. Hvað er til dæmis framleiðsla: Er það að hita brauð, skola grænmeti eða pakka niður vörum?." segir Gísli og vísar til þess að erlent grænmeti sem skolað er hér á landi er kynnt sem íslenskt.

Gísli segir hins vegar erfitt að neyða fyrirtæki til að tilgreina uppruna vörunnar. Evrópureglur komi í veg fyrir það. "En neytendur geta í krafti fjöldans gert slíka kröfu."

Bakarísumræðan hófst fyrir helgi þegar Vísir greindi frá því að kleinuhringir og hnetuvínarbrauð hjá Bakarameistaranum væri flutt inn frosið frá Danmörku. Í kjölfarið steig fyrrverandi starfsstúlka fram og lýsti því hvernig almennir starfsmenn eru látnir stinga hálffrostnum vörum í ofna.

Í dag tjáði fyrrverandi bakari hjá Myllunni sig um Hagkaupsbakaríin "Bakað á staðnum". Í ljós kemur að meirihluti þeirra brauða sem bökuð eru á staðnum eru flutt inn frá Póllandi frosin.

Viðbrögð lesenda Vísis hafa verið sterk og tölvupóstum rignt inn á ritstjórnina. Til dæmis segir í einum póstinum:

Góðan dag

Áhugavert hefur verið að lesa um bakrísbrauðin sem við erum að borða og verða sennilega Íslensk nýbökuð úr ofnunum í búðunum okkar ( líkt og Íslenska grænmetið fær Íslenskan "ríkisborgararétt" á því að vera skolað upp úr Íslensku vatni ).

Ég vinn á Suðurlandsbraut næstum því við hliðina á kaffi Condidori og það er fullyrt af samstarfsfólki mínu að þeir baki engin brauð heldur hiti upp frosið eins og bensínstöðvarnar gera. Það er búið að vera þannig í marga mánuði enda lítið og lélegt úrval af brauði og áberandi dýrt að versla þar.

Veit ekki hvort þetta skiptir nokkru máli í umræðuna en ekki hætta að fjalla um svona hluti fyrir okkur neytenduna.

Annar neytandi segir:

Ég vann vel og lengi hjá N1 og allt sem að er "bakað á staðnum" þar, er keypt hjá myllunni forbakað. Þú færð ekkert bakkelsi í dag frá Myllunni nema að það komi forbakað frá "Schulstad Bake Off" vörulínunni í danmörku.

M.e.a.s. hinir "alíslensku" Snúðar komu frosnir. Öll bakarí, bensínstöðvar, (að ég held) séu að kaupa það sama frá myllunni. Ég hef farið í mörg bakarí og séð Bake Off vörulínuna þar. Glassúrinn er ekki einu sinni búinn til á þessu landi.

Vildi bara koma þessu á framfæri.