Pólsk brauð í bakaríum Myllunnar

Fyrrverandi bakari hjá Myllunni ljóstrar upp um starfsaðferðir fyrirtækisins. Hann segir meirihluta brauðsins í "Bakað á staðnum" í Hagkaupum flutt inn frá Póllandi; honum hafi verið sagt að ljúga þegar fólk spurði hvort bakkelsi væri bakað á staðnum.

Myllan rekur bakaríið "Bakað á staðnum" í Hagkaupum.

„Brauðin sem boðið er upp á í Haugkaupum eru flest flutt inn frá Póllandi,"segir Guðmundur H. Sigurðsson, menntaður bakari, sem hefur snúið baki við bransanum og vill nú segja sannleikann um starfshætti Myllunnar.

„Þegar ég byrjaði hjá Myllunni 2001 voru um 25 bakarar við störf. Í dag starfa þar einir fjórir, fimm bakarar og 130 verkamenn."

Vísir hefur undanfarna daga fjallað um þann nýja veruleika sem blasir við í bakaríum og stórmörkuðum landsins. Vinsælt bakkelsi eins og kleinuhringir, hnetuvínarbrauð og Berlínar bollur er flutt inn frosið frá Danmörku.

„Ég laug. Ef fólk spurði hvar ákveðin vara væri bökuð var mér sagt að segja að hún væri frá Myllunni - bökuð á staðnum. Mér leið illa að segja: Já, þetta er framleitt inn í Myllu í staðinn fyrir sannleikann: Þetta er flutt inn frá Póllandi. Okkur var uppálagt að gera þetta," segir Guðmundur.

Björn Jónsson, framkvæmdastjóri Markaðssviðs Myllunnar, segir tæknina hafa þróast þannig að minni þörf sé á menntuðum bökurum. „Tækin eru svo fullkomin að bökurum hefur fækkað," segir hann.

Björn játar því að hluti brauðsins og sætabrauðsins sem Myllan bíður upp á í Hagkaupum komi frá útlöndum. „Framkvæmdastjóri Bakarameistarans hefur viðurkennt að flytja inn kleinuhringi í hagræðingaskyni. Menn verða að gera það sem er hagstæðast. Okkar stefna er að bjóða upp á sem best verð fyrir okkar viðskiptavini. Ef það hentar að flytja inn gerum við það."

Björn segir jafnframt þá staðhæfingu Guðmundur að bökurum hefði verið sagt að upplýsa ekki um uppruna vörunnar fráleita. „Það er bara rangt," segir hann.