Gustafsson hættur hjá Keflavík

Sænski varnarmaðurinn Kenneth Gustafsson hefur yfirgefið herbúðir Keflavíkur en hann hefur verið hjá félaginu í fjögur ár. Hann gekk til liðs við Keflavík sumarið 2005.

Ástæða þess að Gustafsson er hættur hjá Keflavík er ástandið í efnahagslífinu. Á heimasíðu Keflavíkur má sjá bréf sem hann skrifaði til stuðningsmanna liðsins en það má einnig sjá hér að neðan.

„Kæru félagar og stuðningsmenn Keflavíkur,

í dag hef ég fengið samningi mínum við Keflavík rift sem þýðir að ég fer nú frá félaginu. Það geri ég einkum vegna ástandsins sem nú er komið upp á Íslandi og hefur haft alvarlegar afleiðingar fyrir fyrirtæki í landinu og einnig íþróttafélög.

Ég hef verið í liðinu í 3 1/2 ár og þar hafa skipst á skin og skúrir fyrir mig og félagið. Hápunktarnir á vellinum hafa verið leikirnir gegn Mainz í Evrópukeppninni árið 2005, sigurinn í bikarkeppninni árið 2006 og allt síðasta tímabil (ok, nema tveir síðustu leikirnir...). Utan vallar hef ég eignast marga góða vini hér í bæ, skoðað mest allt Ísland (Gaui segir alltaf að ég hafi séð meira af landinu en hann!), klifið Hvannadalshnjúk þar sem ég brann hressilega í framan, heimsótt Mete fyrir austan, Balla Sig. fyrir norðan, farið til Grænlands og ég gæti haldið lengi áfram... Eins og þið sjáið hefur mér liðið vel í Keflavík en allt verður að taka enda og nú er minn tími kominn.

Ég vil þakka öllum félögum mínum í Keflavíkurliðinu fyrir samveruna, Kristjáni, Kidda G., Rajko, Dóa, Fal, Jóni Örvari, stjórnarmönnum og starfsmönnum félagsins og síðast en ekki síst PUMA-sveitinni, þið sáuð til þess að það var alltaf gaman að spila fyrir Keflavík.

Maður veit aldrei hvað gerist í lífinu, ég gæti komið aftur einhvern daginn en þangað til óska ég liðinu og félaginu alls hins besta og ég er viss um að þið verðið áfram best spilandi fótboltalið Íslands!"

Bestu kveðjur,

Kenneth."