Ronaldo hefði þurft að endurtaka spyrnuna

Fyrrum HM-dómarinn Graham Poll segir að Cristiano Ronaldo hefði þurft að endurtaka spyrnu sína í vítakeppni úrslitaleiksins í Meistaradeildinni í gær ef hann hefði skorað úr henni.

Ronaldo, sem var hetja liðsins þegar hann kom því 1-0 yfir í leiknum, var eini United-maðurinn sem klikkaði á spyrnu í vítakeppninini.

Spyrnan leit aldrei vel út hjá Portúgalanum unga, en hann stoppaði og hikaði í atrennu sinni og lét svo Petr Cech verja frá sér.

Graham Poll segir að hann hefði þurft að taka spyrnuna aftur ef hann hefði skorað.

"Það er óásættanlegt að menn stoppi í atrennu sinni, en að stoppa og horfa á markvörðinn er bara óíþróttamannslegt. Ég er 100% viss um að dómarinn hefði látið hann spyrna aftur ef hann hefði skorað," sagði Poll í samtali við Daily Telegraph.

Hann var sammála ákvörðun dómarans að vísa Didier Drogba af velli eftir að hann sló til Nemanja Vidic.

"Didier Drogba varð að fá rautt og menn sem veifa svona höndunum eiga skilið að fá rautt. Chelsea hélt ekki aga og það kostaði þá leikinn," sagði Poll.

Altalað er að það hafi verið Drogba sem átti að taka fimmtu spyrnu Chelsea í vítakeppninni en ekki John Terry fyrirliði, en Terry bauðst til að taka spyrnuna eftir að Drogba var rekinn af velli.