Ætlum að verja fjölskyldurnar í borginni

Aðgerðaráætlun Reykjavíkurborgar vegna breytinga í fjármála- og atvinnuumhverfi var samþykkt samhljóða í borgarstjórn fyrr í dag með öllum greiddum atkvæðum. Hanna Birna Kristjánsdóttir borgarstjóri segir samstöðuna sem náðist um málið í borgarstjórn skipta miklu máli.

„Við lögðum mikla áherslu á að meiri- og minnihluti næði samstöðu um þetta verkefni og það kom okkur því í raun ekki á óvart að allir borgarfulltrúarnir greiddu áætluninni atkvæði. Þetta er okkar vörn fyrir borgarbúa og það á að vera aðalatriðið, allt dægurþras í pólitík og annað verður að bíða," segir Hanna Birna.

Í aðgerðaráætluninni segir að þrátt fyrir þrengri fjárhagsstöðu verði því að svo stöddu ekki mætt með hækkunum á gjaldskrám fyrir grunnþjónustu. Í aðgerðaráætlunin er kveðið á um að aukins aðhalds verði gætt í innkaupum og stefnt að 15% sparnaði í þeim á næstu mánuðum og árum.

Aðspurð hvort þessi 15% sparnaður sé mögulegur eins og staðan sé í þjóðfélaginu í dag viðurkennir Hanna Birna að þetta sé metnaðarfullt markmið en nauðsynlegt. „Við teljum þetta hinsvegar raunhæft markmið."

Ekki er von á hækkunum á gjaldskrám fyrir grunnþjónustu eins og fyrr segir. „Við segjum að svo stöddu sé ekki von á hækkunum og við ætlum að verja borgarbúa og fjölskyldurnar í borginni. Þetta er okkar innlegg en þetta er stór biti fyrir borgarsjóð. Við teljum hinsvegar að hann geti tekið þennan bita, og það er mikilvægt að hann geri það."