Carragher segir eigendur Liverpool gráðuga

Jamie Carragher, leikmaður Liverpool til margra ára, segir að bandrískir eigendur félagsins séu ekkert annað en gráðugir tækifærissinnar.

Þetta kemur fram í nýrri sjálfsævisögu hans sem nefnist „Carra: Ævisagan mín". Hann sagði að þeir George Gillett og Tom Hicks hafi keypt félagið einungis í hagnaðarskyni. Einnig lýsir hann yfir vonbrigðum sínum að þeir hafi ekki staðið við loforð sín um að byggja nýjan leikvang og leggja pening í leikmannakaup.

„Þeir keyptu ekki Liverpool í góðgerðarskyni. Þeir ætluðu sér aldrei að kasta frá sér öllum þeim milljónum sem þeir hafa sankað að sér undanfarna hálfa öld. Þeir vildu kaupa okkur því áætlanir um byggingu nýs leikvangs gaf fyrirheit um að græða helling af pening og auka verðgildi félagsins."

„Hugsa sér hversu marga heimsklassaleikmenn hefði verið hægt að kaupa til félagsins fyrir 200 milljónir punda. Ef Gillett og Hicks myndu hins vegar selja félagið, myndu þeir og bankarnir þeirra standa eftir með mikinn gróða."

„Mér verður illt af því að bara hugsa til þess."

Hann segir að gagnrýni Rafael Benitez knattspyrnustjóra Liverpool eftir að tapaði fyrir AC Milan í úrslitum Meistaradeildarinnar í fyrra hafi verið upphafið að þeim deilum sem tröllriðu félaginu í kjölfarið.

„Þetta var pólitísk barátta og snerist ekkert um knattspyrnu," segir Carragher í bók sinni.