Warren Buffett: Ég greiði of lága skatta

Kaupsýslumaðurinn Warren Buffett, sem er næstríkasti maður Bandaríkjanna, segist greiða of lága skatta. Hann segir að allir starfsmenn sínir greiði hlutfallslega hærri skatt en hann, þar á meðal ritari hans. Í viðtali við NBC sjónvarpsstöðina sagðist hann telja að starfsfólk sitt borgaði að meðaltali tvöfalt hærra hlutfall af launum sínum í skatt en hann sjálfur. Buffett telur að skattakerfið í Bandaríkjunum hafi þróast í ranga átt á síðustu árum. Það þjóni nú einungis hinum ríku en ekki millistéttinni. Hann telur að þessar breytingar séu slæmar og kallar eftir umræðu um þær.