Beckham og Abramovich í algjörum sérflokki

Knattspyrnutímaritið 4-4-2 hefur birt lista sinn yfir ríkustu menn í ensku knattspyrnunni. Roman Abramovich, eigandi Chelsea, og knattspyrnumaðurinn David Beckham eru þar áfram kóngar í ríki sínu hvor í sínum flokki.

Niðurstaða úttektar blaðsins leiddi í ljós tvær staðreyndir. Enski boltinn rakar inn peningum sem aldrei fyrr og þeir ríku eru alltaf að verða ríkari. Innrás erlendra fjárfesta í ensku knattspyrnuna hefur verið áberandi síðustu misseri og á síðustu 12 mánuðum hafa komið inn í enska boltann menn sem samtals eru metnir á hátt í 1400 milljarða króna.

Íþróttamálaráðherra Breta gerði athugasemd við himinhá laun leikmanna á Englandi á dögunum, en þrátt fyrir það eru samt ekki nema 14 knattspyrnumenn á lista yfir 100 ríkustu mennina í enska boltanum.

Ronaldo í 100. sæti



Tveir nýliðar úr röðum knattspyrnumanna eru komnir inn á lista 100 ríkustu - þeir Didier Drogba hjá Chelsea (96.) sem metinn er á um 1,7 milljarða og Cristiano Ronaldo skríður í 100. sætið og er talinn eiga um 1,5 milljarða í bankanum. Séu knattspyrnumennirnir sjálfir með há laun - eru þau ekki nema klink við hliðina á eigum fjárfesta og eigenda á Englandi.

Björgólfur á langt í land





Á meðal nýliða á lista ríkustu manna í enska boltanum eru Rússinn Alisher Usmanov sem nýlega keypti hlut í Arsenal, Formúlumógúllinn Bernie Ecclestone og svo auðvitað Björgólfur Guðmundsson sem metinn er á um 73,5 milljarða króna í úttekt 4-4-2. Hann er samt langt frá því að komast inn á topp 10 listann.

Ríkustu menn í enska boltanum:



1) Roman Abramovich, Chelsea - 1340 milljarðar

2) Joe Lewis , Tottenham Hotspur - 347

3) Alisher Usmanov, Arsenal - 342

4) Bernie Ecclestone, QPR - 310

5) Mike Ashley, Newcastle United - 198

6) Dermot Desmond, Celtic - 198

7) Malcolm Glazer, Man Utd - 155

8) Stanley Kroenke, Arsenal - 149

9) Trevor Hemmings, Preston - 121

10) Lord Ashcroft, Watford - 117



Ríkustu knattspyrnumenn á Bretlandseyjum:

1) David Beckham, 32, LA Galaxy - 13,9 milljarðar

2) Michael Owen, 27, Newcastle Utd - 4,6

3) Robbie Fowler, 32, Cardiff City - 3,7

4) Wayne Rooney, 22, Man Utd - 3,7

5) Sol Campbell, 33, Portsmouth - 3,5

6) Andriy Shevchenko, 31, Chelsea - 3,1

6) Rio Ferdinand, 29, Man Utd - 3,1

8) Ryan Giggs, 33, Man Utd - 2,8

9) Michael Ballack, 31, Chelsea - 2,2

10) Steven Gerrard, 27, Liverpool - 1,9