Tveir menn ábyrgir fyrir árásinni á Bhutto

Tveir tilræðismenn sprengdu sjálfsmorðssprengjurnar sem beint var gegn Benazir Bhutto fyrrverandi forsætisráðherra Pakistan þegar hún sneri aftur úr útlegð í síðustu viku. Bhutto slapp ómeidd en að minnsta kosti 136 manns létust í tilræðinu á bílalest hennar í Karachi á fimmtudag.

Í upphafi var talið að einungis einn maður hafi sprengt sjálfsmorðssprengju í tilræðinu, en háttsettur embættismaður sem óskaði nafnleyndar sagði að tvö höfuð hefðu fundist á vettvangi. Enginn hefði vitjað þeirra og það bendi til að mennirnir hafi borið ábyrgð á sprengingunum.