Horfur á slagviðri þegar friðarsúlan verður tendruð

Búast má við að það verði lágskýjað, hvasst og jafnvel rigning annað kvöld þegar Yoko Ono tendrar friðarsúluna í Viðey með formlegum hætti.

„Það verður austanátt, svona 8-9 metrar á sekúndu og líklega rignir þótt enn sé nokkur óvissa þar um,“ segir Sigurður Þ. Ragnarsson, veðurfræðingur á fréttastofu Stöðvar 2. Hann segir enn fremur að skýjahæð verði 30-40 metrar sem þýðir að það verður lágskýjað. „Það er þannig í austanáttum skýlir Esjan en ég á von á að það bæti nokkuð í vindinn þegar líður á kvöldið.“

Eins og fram hefur komið verður friðarsúlan tendruð í minningu Johns Lennons sem hefði orðið 67 ára á morgun. Friðarsúlan mun svo loga til 8. desember en það er dánardægur Lennons sem féll fyrir morðingahend

Hvalaskoðun Reykjavíkur mun hefja sérstakar siglingar í tengslum við friðarsúluna, en farnar verða tvær ferðir í Viðey annað kvöld, kl. 21.30 og 22.30 frá Skarfabakka í Sundahöfn. Þá er ráðgert að sigla í Viðey á hverju kvöldi kl. 20 eða eins og veður leyfir.

Stefnt er að því að friðarsúlan lýsi upp himinninn þessa tvo mánuði ár hvert. Einnig verður kveikt á ljósinu á gamlársdag, á jafndægri að vori þegar ljósið mun loga í viku og á sérstökum hátíðardögum sem Yoko Ono og Reykjavíkurborg koma sér saman um eftir því sem segir á vef borgarinnar.