Björn Bergmann: Aldurinn skiptir ekki máli

Björn Bergmann Sigurðarson skoraði bæði mörk ÍA gegn Vals í gærkvöld og þar með sín fyrstu mörk á Íslandsmótinu. Björn er einungis sextán ára gamall.

"Ég var auðvitað rosalega ánægður með leikinn og hef ég verið að bíða lengi eftir fyrsta markinu," sagði Björn við Vísi. Hann hefur komið við sögu í níu leikjum í deildinni með ÍA en skoraði semsagt sín fyrstu tvö mörk í gær.

Hann á ekki langt að sækja hæfileikana en hann er hálfbróðir þeirra Þórðar, Bjarna og Jóhannesar Karls Guðjónssonar. Þeir tveir fyrstnefndu leika með ÍA en Jóhannes Karl er landsliðsmaður sem leikur með Burnley í ensku B-deildinni.

"Þeir hafa allir hjálpað mér mjög mikið, sérstaklega Bjarni og Þórður sem eru með mér í ÍA. Það er samt leiðinlegt að Doddi skyldi meiðast en þeir hafa alltaf verið duglegir að gefa mér góð ráð."

Hann segir að hann sé bara einn af strákunum í liðinu, þrátt fyrir að vera sá yngsti. "Aldurinn skiptir í raun engu máli. Ef maður getur eitthvað í fótbolta á maður heima þarna."

Skagamenn hafa komið talsvert á óvart í sumar en liðið situr í þriðja sæti deildarinnar og stefnir í Evrópukeppnina á næsta ári. "Þetta sumar er búið að vera æðislega skemmtilegt, fyrst og fremst. Ég er til dæmis búinn að fá að spila miklu meira en ég átti von á," sagði Björn. "Það var að vísu ekkert sérstaklega gaman að tapa fyrir Fylki í bikarnum en þriðja sætið í deildinni er góður árangur. Við ætlum okkur að halda því."

Hann segir það liggja ljóst fyrir að hann muni spila áfram hér á landi næsta sumar líka. "Ef ég fæ tækifæri í atvinnumennskunni er betra að vera aðeins eldri og reyndari. Ég mun samt reyna að koma mér út eftir næsta tímabil."

Sjá einnig: 20-30 félög á eftir Birni Bergmanni