Willum: Guðjón tók dómarann úr jafnvægi

Willum Þór Þórsson var að vonum ekki sáttur eftir leikinn gegn ÍA enda var Valsliðið að misnota enn eitt tækifærið til að komast á toppinn. Hann segir að þjálfari Skagamanna, Guðjón Þórðarson, hafi tekið dómarann úr jafnvægi í leiknum.

„Við sem erum að temja okkur prúðmennsku í þessum leik horfum upp á Guðjón Þórðarson hrauna yfir Kristinn Jakobsson dómara. Guðjón tók hann gjörsamlega úr jafnvægi í fyrri hálfleik. Það var ekkert tekið á því og eftir þetta var Kristinn ekki í jafnvægi að dæma þennan leik," sagði Willum við Vísi eftir leik.

„Bjarni Guðjónsson fékk bara algjörlega það sem hann vildi inni á vellinum. Ég er ósáttur við að þjálfari þeirra komist upp með að hrauna yfir dómarann."

Honum fanns leikurinn þó heilt yfir ágætur. „Skagaliðið er gott og vel skipulagt. Þeir eru hættulegir í skyndisóknum. Við vorum búnir að undirbúa okkur undir það. Við vorum ekki á vaktinni þegar þeir jafna, þeir komu hratt á okkur. Við gerðum mistök þar og það var óþarfi að fá hitt markið síðan í kjölfarið. Þessi kafli var slæmur en að öðru leyti spiluðum við vel."

Í næstu umferð leika Valsmenn sannkallaðan risaleik við FH. Sá leikur gæti ráðið úrslitum í baráttunni um Íslandsmeistaratitilinn. „Mér lýst frábærlega á það. Það verður bara úrslitaleikur," sagði Willum að lokum.