Áskorunin hljóðar upp á óbreytt ástand

Gunnar Birgisson, bæjarstjóri í Kópavogi segir að áskorun sem samþykkt var á fjölmennum fundi í Salnum í gærkvöldi hafi komið sér afskaplega mikið á óvart. Að hans mati hljóðar áskorunin upp á að gera einfaldlega ekki neitt á svæðinu. Hann segir að samtökum um betri byggð á Kársnesi sé greinilega einnig sama um hvort hægt sé að halda störfum í bæjarfélaginu. Hún hljómar upp á að gera ekki neitt.

„Verði þessu fólki að vilja sínum þýðir það bara óbreytt ástand á vestursvæði Kárssness," segir Gunnar. „Þau eru greinilega ánægð með Kársnesið eins og það er í dag og þessi áskorun kom mér verulega á óvart," segir bæjarstjórinn. Rúmlega 300 manns mættu á íbúafundinn í gærkvöldi og þar var samþykkt nær einróma að skora á bæjaryfirvöld að falla frá stækkun hafnarinnar, gerð landfyllingar, aukningu atvinnuhúsnæðis og hafnsækinnar starfsemi. Þá voru yfirvöld einnig hvött til að hætta við áform um frekari íbúafjölgun á Kársnesi.

„Ég held nú að það sé vilji flestra íbúa hér í hverfinu að þrífa eitthvað til hér á vestanverðu nesinu," segir Gunnar. Hann segir þó að ekkert verði gert á svæðinu án þess að Kópavogsbúar verði hafðir með í ráðum. „Við ákváðum í dag að framlengja frestinn til að skila inn athugasemdum um tvær vikur. Eftir það verður haft samráð við íbúana um framhald málsins." Gunnar segir augljóst að fólk sé ekki tilbúið til þess að stækka höfnina og að yfirvöld séu tilbúin til að skoða það mál.

Gunnar segist ekki ánægður með framsetningu málsins á fundinum í gærkvöldi. Þar hafi verið snúið út úr tölum og þær túlkaðar frjálslega. „Það var afar djarft farið með tölur og ég veit ekki hvað fólk telur sig vinna með því," segir Gunnar. Hann segir að þegar liggi fyrir ákvörðun um að íbúabyggð á tveimur reitum á Kársnesinu og að það sé um að ræða um 220 íbúðir. Gunnar segir að farið verði varlega í alla uppbyggingu á svæðinu og hugað verði vel að því að ofbjóða ekki innviðum hverfisins. Hann bendir á að bílaumferð hafi ekki aukist mikið á Kársnesbrautinni síðasta áratuginn enda hafi eldri íbúum fjölgað á kostnað barnafólks.