Hart tekið á unglingadrykkju á Menningarnótt

Viðbragðsaðilar eins og slökkvilið, lögregla og björgunarsveitir hafa töluverðan viðbúnað vegna Menningarnætur og verður tekið sérstaklega hart á unglingadrykkju.

Að venju er búist við að miklum mannfjölda í miðborg Reykjavíkur á laugardag þegar Menningarnótt verður sett. Aðgerðastjórn almannavarna á höfuðborgarsvæðinu sér um að samræma öryggismálin og verða viðbragðsaðilar með sameiginlega bækistöð og útkallslið í Ingólfsstræti við Arnarhól.

Stjórnstöð verður í bifreið Flugbjörgunarsveitarinnar en auk þess verða þar sjúkra-, slökkvi- og lögreglubílar. Þar verður meðal annars sjúkraskýli og aðstaða til að annast týnd börn. Lögregla segir afar mikilvægt er að neyðarbílar komist ávallt leiðar sinnar. Þá verður slysadeild Landspítalans með aukaviðbúnað þegar líður á kvöldið og nóttina, sambærilegt við það skipulag sem er á gamlárskvöldi.

Fjölmörgum götum verður lokað, annars vegar í tengslum við Reykjavíkurmaraþon og hins vegar Menningarnótt og stórtónleika á Miklatúni. Umferðardeild lögreglunnar mun sinna eftirliti með lokun gatna og hvetur lögregla almenningi til þess að sýna lipurð og þolinmæði í umferðinni því búast megi við töfum.

Menningarnótt lýkur eins og undanfarin ár með flugeldasýningu og verða umferðarljós á Sæbraut, Hringbraut, Miklubraut og Bústaðavegi tekin úr sambandi að henni lokinni og þá mun lögregla stjórna umferð. Um 20 lögreglumenn munu sinna umferðarstjórn á áðurnefndum götum. Þá verður vinstri beygja af Bústaðavegi í vesturátt inn á Kringlumýrarbraut til suðurs bönnuð tímabundið eftir að dagskrá lýkur til að liðka fyrir umferð um Bústaðaveg frá miðborginni.

Lögreglan færir börn yngri en 16 ára í athvarfið séu þau úti eftir lögboðinn útivistartíma samkvæmt barnaverndarlögum svo og þau ungmenni yngri en 18 ára sem eru undir áhrifum áfengis og/eða annarra vímugjafa.