„Hélt að þeir myndu drepa vin minn“

Sjálfboðaliði á vegum Félagsins Ísland-Palestína varð fyrir árás hóps ísraelskra ungmenna á götum borgarinnar Hebron í Ísrael í fyrradag. Spörkuðu þeir meðal annars í maga hennar og köstuðu grjóthnullungi í höfuðið á öðrum grískum sjálfboðaliða.

„Við vorum að reyna róa niður hóp ísraelskra ungmenna sem voru að veitast að palestínskum krökkum," sagði Ortrud Gessler Guðnason, sjálfboðaliði, í samtali við Vísi. „Palestínsku krakkarnir komust í burtu en þá fóru Ísraelarnir að atast í okkur."

Ortrud er þýskur ríkisborgari en hún hefur verið búsett um nokkurt skeið á Íslandi. Ortrud hefur starfað við mannúðarmál í Hebron í Ísrael síðustu vikur á vegum Félagsins Ísland-Palestína.

Ortrud var í félagi með grískum sjálfboðaliða þegar árásin átti sér stað. Hún segir ísraelsku ungmennin hafa elt sig og félaga sinn í nokkurn tíma áður en þeir létu til skara skríða. „Þeir byrjuðu að lemja okkur. Svo köstuðu þeir grjóthnullingi í höfuðið á félaga mínum þannig að hann féll í jörðina. Þegar ég reyndi að hjálpa honum réðust þeir á mig og spörkuðu í mig."

Ortrud og félagi hennar komust að lokum undan við illan leik en leggja þurfti gríska sjálfboðaliðann inn á sjúkrahús vegna þeirra áverka sem hann hlaut. Hann hefur nú verið útskrifaður af spítalanum. Ortrud er illa marin eftir átökin en slapp að öðru leyti vel.

Ortrud segir að á meðan á árásinni stóð hafi hún óttast um líf félaga síns. Hún segist þó ekki ætla að leggja árar í bát og fara heim. „Ég var mjög hrædd um að þeir myndu drepa vin minn. Ég ætla hins vegar ekki að fara heim heldur klára þær vikur sem ég á eftir hér."