Magnús Oddson heiðraður

Ferðamálaráð Evrópu heldur í dag aðalfund sinn á Nordica hóteli í dag. Þetta er í annað sinn í 59 ára sögu samtakanna sem aðalfundur þeirra er haldinn hér á landi. Að loknu ávarpi Sturlu Böðvarssonar, samgönguráðherra, var Magnúsi Oddsyni, ferðamálastjóra Íslands, veitt viðurkenning fyrir „úrvalsþjónustu við Ferðamálasamtök Evrópu í yfir 15 ár," eins og segir í tilkynningu. Magnús var ennfremur kjörinn í framkvæmdanefnd samtakanna til næstu tveggja ára. Á fundinum var Georgíu veitt innganga í samtökin og eru aðildarlöndin nú 38.

Ferðamálaráð Evrópu einbeitir sér að kynningu á ferðamöguleikum í Evrópu á mörkuðum utan Evrópu. Samtökin reka stóra alþjóðlega upplýsingavefi, gefa út kynningarrit og bæklinga og skipuleggja heimsóknir og söluherferðir til Evrópulanda.