Fyrningarfrestur afnuminn í grófustu brotum gegn börnum

Fyrningarfrestur í alvarlegustu kynferðisbrotum gegn börnum verður afnuminn og brot byrja ekki að fyrnast fyrr en fólk nær 18 ára aldri í stað 14 samkvæmt nýjum breytingartillögum allsherjarnefndar Alþingis á ákvæðum í kynferðisbrotakafla hegningarlaganna.

Það var Bjarni Benediktsson, formaður allsherjarnefndar, sem mælti fyrir þessum breytingum áðan og sagði að með þessu væri verið að taka tillit til athugasemda frá fjölmörgum aðilum. Benti Bjarni á að kynferðisbrot gegn börnum væru misalvarleg og af þeim sökum hefði ekki verið fallist á það að öll kynferðisbrot gegn börnum yrðu ófyrnanleg.

Hann sagði enn fremur að þessi breyting kallaði á einhver tilvik þar sem fram færi rannsókn á gömlum málum en engu að síður teldi allsherjarnefnd að ráðast ætti í þessar breytingar.

Þá leggur nefndin enn fremur til að kynferðislegur lágmarksaldur verði hækkaður úr 14 árum í 15 enda hafi fjölmargir aðilar komið á fund hennar og bent á að 14 ára börn væru of ung til að átta sig á hvað fælist í því að hafa mök við fullorðinn einsktakling.

Ágúst Ólafur Ágústsson, varaformaður Samfylkingarinnar, fagnaði þessum breytingum sem gerðar yrðu á kynferðisbrotakaflanum þótt ekki yrði gengið eins lagt og hann hefur lagt til, þ.e. að öll kynferðisbrot gegn börnum verði ófyrnanleg. Sagði hann daginn stóran og þetta ein þýðingarmestu lög sem samþykkt yrðu á þessu þingi.

Kolbrún Halldórsdóttir, þingkona Vinstri - grænna, benti hins vegar á þessar breytingar hefðu ekki verið sársaukalausar því dregin hefði verið til baka breytingartillaga frá minnihlutanum um að það yrði gert saknæmt að kaupa vændi gegn því að reglan um fyrninguna kæmist í gegn. Áfram yrði barist fyrir því að þessi svokallaða sænska leið yrði að raunveruleika hér á landi.