Hart deilt á Vinstri græna á Alþingi

Þingmenn stjórnarflokkanna sóttu að Vinstri grænum á Alþingi í morgun og sökuðu þá um tvískinnung í umhverfismálum. Varaformaður Framsóknarflokksins sagði að kæmust Vinstri grænir til valda kallaði það á stöðnun á öllum sviðum sem tæki Ísland tuttugu ár aftur í tímann.

Margt bendir til að stjórnarflokkarnir ætli sér að herða róðurinn í málflutningi sínum gegn Vinstri grænum, eftir að vinstri grænir koma ítrekað vel út úr skoðanakönnunum. Guðjón Ólafur Jónsson þingmaður Framsóknarflokksins fór í ræðustól um dagskrá þingsins í morgun og vildi að formaður vinstri grænna skýrði meint sinnaskipti hans varðandi virkjanir í neðri Þjóðrsá, sem hann sagði Steingrím hafa stutt 2005 en hafnað í febrúar síðast liðnum. En þetta var í þriðja sinn sem Guðjón tekur þetta mál upp á þingi á stuttum tíma.

"Og háttvirtur þingmaður hefur ekki vikið einu einasta orði að þessu eða reynt að skýra út þessar breyttu skoðanir sínar á virkjunum í neðri hluta Þjórsár," sagði Guðjón Ólafur.

Steingrímur sagðist ítrekað reynt að rökræða þetta við þingmanninn en hann virtist rökheldur.

"Afstaða mín og míns flokks er skýr í þessu máli. Við viljum stöðva allar frekari stóriðjuframkvæmdir og stórvirkjanir sem þeim tengjast," sagði Steingrímur J. Sigfússon.

Guðlaugur Þór Þórðarson sagði Steingrím ganga hart á eftir svörum frá ráðherrum í þinginu.

"En þið sjáið hér hverning hann bregst við sambærilegum hlutum, þegar menn eru eðli málsins samkvæmt að spyrja um sinnaskipti háttvirts þingmanns í þessu máli," sagði Guðlaugur Þór Þóraðrson þingmaður Sjálfstæðisflokksins.

"Og nú hefur það komið í ljós að Steingrímur Sigfússon sem studdi eitt mál fyrir tveimur árum, að virkja neðri hluta Þjórsár, að hann er orðinn á móti því líka," sagði Guðni Ágústsson landbúnaðarráðherra.

Steingrímur sagðist ekki geta gert Framsóknarmönnum þann greiða sem hann vissi að þeir myndu helst vilja af honum að þiggja, að hætta að vera til. "Ég veit það og ég finn það að tilvera mín og tilvist í íslenskum stjórnmálum veldur miklu hugarangri í Framsóknarflokknum," sagði formaður Vinstri grænna.