Rússar fordæma árás á íranska ræðisskrifstofu

Rússar fordæmdu í dag árás Bandaríkjamanna á ræðisskrifstofu Írana í gærmorgun. Yfirlýsingin sem utanríkisráðuneytið sendi frá sér var harðorð, þar sem árás Bandaríkjamanna í gær var meðal annars kölluð "algjörlega óásættanleg" og "brot á alþjóðalögum".

Þá sagði í yfirlýsingunni: "aðgerð Bandaríkjahers er misnotkun á heimild sem  öryggisráð S.þ. veitti fjölþjóðlegu herafli til að koma á öryggi í Írak."

Samkvæmt umboði frá öryggisráðinu er eitt hlutverka erlenda herliðsins í Írak að tryggja öryggi erlendra diplómata í landinu.

Bandarískir hermenn réðust inn í íranska ræðisskrifstofu í norðuríraska bænum Arbil í gærmorgun og handtóku þar meðal annarra diplómata, sem njóta sérstakrar verndar, samkvæmt samþykktum um alþjóðasamskipti og diplómatísk samskipti.

Bandaríkjamenn segja handtökurnar hafa verið til að hindra aðstoð við hryðjuverkamenn en Rússar segja slíkar ásakanir verði að vera afar sterkum rökum studdar.