Biðja vesturlönd að styðja sjálfstæði Kosovo

Stjórn og stjórnarandstaða í Kosovo sameinuðust í dag í ákalli til vesturlanda að styðja sjálfstæði Kosovo. Mikil spenna er í héraðinu, en á morgun rennur út frestur til að skera úr um það hvort Kosovo fái sjálfstæði.

Af tveimur milljónum íbúa Kosovo eru tvö hundruð þúsund serbar, sem flestir eiga heima í norðanverðu Kosovo eða búa sem flóttamenn í Serbíu. Stjórnvöld í Kosovo segja að flóttamönnum sé frjálst að snúa aftur en að Serbar geti ekki haldið Kosovo í óvissu um alla eilífð.

Á vesturlöndum er víða mikill skilningur á því sjónarmiði að stjórnin í Belgrad hafi fyrirgert rétti sínum til að fara með málefni Kosovo, eftir framferði serbneska hersins fyrir átta árum, þegar herinn brenndi þorp Kosovo-albana og stökkti hundruðum þúsundum þeirra á flótta úr landinu.

Rússar standa gegn sjálfstæði Kosovo en Bandaríkjamenn eru því fylgjandi. Evrópusambandið varar Kosovomenn við að lýsa yfir sjálfstæði án þess að um það náist alþjóðlegt samkomulag.