Yakubu er leikmaður 16. umferðar

SMELLTU HÉR TIL AÐ SKOÐA MYNDBAND AF LEIKMANNI UMFERÐARINNAR 

Yakubu skoraði þrennu fyrir Everton um helgina gegn Fulham og er leikmaður 16. umferðar ensku úrvalsdeildarinnar.

Hann skoraði mörkin þrjú öll í síðari hálfleik en þetta voru einu mörkin sem voru skoruð í leiknum. Um leið lék Everton sinn tíunda leik í röð án taps.

Yakubu hefur nú skoraði níu mörk í fjórtán leikjum á tímabilinu og er handviss um að hann geti bætt sitt persónulega met sem er að skora nítján mörk á einu tímabili. Þeim árangri náði hann bæði með Middlesbrough og Portsmouth.

Hins vegar gæti Afríkukeppnin sett strik í þann reikning. Í gær greindi hann frá því að hann hefði rætt við Berti Vogts, landsliðsþjálfara Nígeríu, og að þeir hefðu hreinsað það slæma loft sem var á milli þeirra. Hann sé því á leiðinni í Afríkukeppnina með landsliði Nígeríu.

Yakubu segir að þrátt fyrir að hann missi af nokkrum leikjum vegna Afríkukeppninnar sé hann þess fullviss um að hann geti náð tuttugu mörkum.

„Mér finnst ég verða sífellt sterkari og betri," sagði hann. „Þetta var fremur erfitt í upphafi en ég sagði sjálfum mér í sífellu að mörkin myndu koma. Ég missti aldrei trúna á sjálfum mér."

Yakubu hóf feril sinn með Maccabi Haifa í Ísrael. Fyrsta árið hans var hann lánaður til Hapoel Kfar Saba en eftir að hann kom til baka vann hann tvo meistaratitla með félaginu og bætti mörg markamet með félaginu.

Hann gekk svo til liðs við Portsmouth í janúar 2003 en um vorið varð félagið meistari í ensku 1. deildinni. Hann skoraði að meðaltali mark í öðrum hverjum leik fyrir félagið það tímabilið.

Yakubu gekk vel fyrsta heila tímabilið sitt með Portsmouth og skoraði til að mynda fjögur mörk í einum og sama leiknum gegn Middlesbrough. Um sumarið vildu mörg félög fá hann til sín og voru tilbúin að borga háar fjárhæðir fyrir hann en hann ákvað að vera um kyrrt og hjálpa félaginu að festa sig í sessi í úrvalsdeildinni.

Það gerði hann. Yakubu skoraði jöfnunarmarkið í mikilvægum leik við Bolton í maí 2005 sem tryggði Portsmouth úrvalsdeildarsætið það tímabilið.

Yakubu fór til Middlesbrough um sumarið þar sem hann var í tvö ár. Hann kostaði félagið 7,5 milljónir punda og skoraði til að mynda eitt mark í ótrúlegum sigri 3-0 sigri á Chelsea fyrra tímabilið sitt en liðið vann einnig Manchester United og Arsenal á tímabilinu. Yakubu skoraði í báðum þeim leikjum.

Hann var áfram eftirsóttur og ákvað á endanum að ganga til liðs við Everton fyrir 11,25 milljónir punda. Hann skoraði sitt fyrsta mark fyrir félagið eftir aðeins tíu mínútur í sínum fyrsta leik er Everton vann Bolton, 2-1, á útivelli.

Yakubu er sá Afríkumaður sem hefur skorað flest mörk í sögu ensku úrvalsdeildarinnar og er væntanlega hvergi nærri hættur.

Nafn: Yakubu Aiyegbeni

Fæddur: 22. nóvember 1982 í Benin, Nígeríu.

Félög: Julius Berger (Nígeríu), Maggabi Haifa (Ísrael), Hapoel Kfar Saba (Ísrael, lán), Portsmouth, Middlesbrough, Everton.

Númer: 22.