Framsókn tapar fimm kjördæmakjörnum þingmönnum á landsbyggðinni

Framsóknarflokkurinn tapar fimm af átta kjördæmakjörnum þingmönnum sínum á landsbyggðinni, samkvæmt samanlögðum könnunum Stöðvar tvö í landsbyggðarkjördæmunum. Sjálfstæðisflokkurinn stendur í stað en Vinstri grænir bæta við sig fjórum.

Nokkur munur er á þremur könnunum sem birst hafa á undanförnum dögum, frá Capacent Gallup, Blaðinu og Fréttablaðinu. Skoðum fyrst stöðu Framsóknarflokksins. Fylgi hans er nokkuð svipað milli þessara þriggja kannanna, er frá 8,6 prósentum í Fréttablaðinu á sunnudag upp í 9,9 prósent hjá Gallup sem birt var á föstudag.

Þá höfum við reiknað samanlagt fylgi flokkana saman úr þremur könnunum Félagsvísindastofnunar fyrir Stöð tvö, þ.e.a.s. í Norðaustur kjördæmi, Norðvesturkjördæmi og Suðurkjördæmi. Þar mælist Framsóknarflokkurinn með 14,5 prósent. En það skal ítrekað að þarna er aðeins um að ræða stöðuna í þessum þremur kjördæmum.

Frjálslyndi flokkurinn sveiflast frá 5,8 prósentum í Fréttablaðinu upp í 9 prósent hjá Blaðinu og fær 5,7 prósent í landsbyggðarkönnunum Stöðvar tvö. Lítill munur er á fylgi Íslandshreyfingarinnar milli kannana, fylgi hans er á milli tvö til þrjú prósent.

All mikill munur er á fylgi Samfylkingarinnar eftir könnunum. Hún mælist hæst með 22,3 prósent í Fréttablaðinu en lægst hjá Gallup með 18 prósent. Mikill munur er á lægsta og hæsta fylgi Sjálfstæðisflokksins sem fær 37 prósent hjá Gallup en 45 prósent hjá Blaðinu og er með 30,5 prósent í landsbyggðarkönnunum Stöðvar tvö. Og eins er mikill munur á fylginu við Vinstri græna, sem eru lægstir hjá Blaðinu með 15,5 prósent en hæstir hjá Gallup með 25 prósent og 20,5 prósent á landsbyggðinni.

Einar Mar Sigurðarson segir Blaðið og Fréttablaðið nota aðra aðferðafræði en Félagsvísindastofnun og Gallup. Blöðin hringi í fólk úr símaskránni eftir ákveðinni aðferð sem þau hafi þróað og spyrji eingöngu einnrar spurningar.

Einar segir ekki mikinn mun vera á fylgi flokkanna í könnunum dagblaðanna sem yfirleitt séu gerðar á einum degi. Gallup og Félagsvísindastofnun taka hins vegar úrtak úr þjóðskrá og taka nokkra daga í að ná í fólk.

En skoðum aðeins stöðuna á landsbyggðinni í kosningum 2003 annars vegar og í Stöðvar tvö könnununum. Þá sést að Framsókn missir fimm kjördæmakjörna þingmenn frá síðustu kosningum, Frjálslyndir missa einn, Samfylkingin bætir við sig einum, Sjálfstæðisflokkurinn stendur í stað með 8 þingmenn en Vinstri grænir bæta við sig fjórum kjördæmakjörnum þingmönnum á landsbyggðinni.

Munurinn á könnunum blaðanna og Félagsvísindastofnunar og Gallups, gæti m.a. helgast af því að erfitt getur reynst að ná í eldri konur, sem ekki eru skráðar í símaskrá og svo ungt fólk með frelsiskort og því ekki heldur skráð í símaskrá.