Undirbúnir fyrir árás uppvakninga

Lögreglustjórinn í bænum Lansing í Michigan, Bruce Ferguson, segir að hann og menn sínir séu vel undirbúnir ef uppvakningar (zombies) gera árás á bæinn. Hefur hann m.a. fyllt lögreglustöð sína af vélsögum vegna þessa.

"Við höfum æft okkur árum saman til að mæta allskyns hamförum," segir Bruce í samtali við blaðið Lansing State Journal. "Fólk getur verið öruggt um það að ef uppvakningar ráðast á bæinn vitum við hvernig á að loka götum. Og við erum einnig með vélsagirnar klárar."

Það fylgir sögunni að ef uppvakningarnir ætli að lauma sér inn í bæinn vestan frá, eftir I-496 þjóðveginum, er Bruce og hans lið tilbúnir með áætlun um að loka bænum þeim megin frá.