Sjö láta lífið í eldsvoða í Rússlandi

Að minnsta kosti sjö létu lífið og 35 særðust þegar eldur kviknaði í stjórnarbyggingu suðaustur af Moskvu, höfuðborg Rússlands, í morgun. Eldurinn kom upp á fjórðu hæð byggingarinnar.

Búið er að ráða niðurlögum eldsins en eldsupptök eru ókunn. Eldvarnir í opinberum byggingum í Rússlandi eru víða í lélegu ásigkomulagi. Á undanförnum árum hafa fjölmargir látið lífið í slíkum eldsvoðum. Dæmi eru um að neyðarútgangar hafi verið notaðir sem geymslur og því fullir af alls konar drasli sem gerði fólki ókleift að komast út úr brennandi byggingum.