Opnað fyrir netið en andófsmenn lokaðir inni

Stjórnvöld í Búrma hafa nú opnað fyrir netsamband í landinu og stytt útgöngubann sem hefur verið í gildi síðan mótmæli gegn þeim voru í hámarki fyrir tveimur vikum.

Þau hafa látið nokkra þeirra sem tóku þátt í mótmælunum lausa úr fangelsi en fregnir hafa einnig borist af nýjum handtökum á stjórnarandstæðingum. Þannig voru þrír þekktir stjórnarandstæðingar, sem allir hafa verið mörg ár í fangelsi, handteknir í gær.

Herforingjastjórnin í Búrma viðurkennir að tíu menn hafi látið lífið í átökum þegar ráðist var á mótmælendur en andófsmenn og erlendir stjórnarerindrekar segja að miklu fleiri hafi látið lífið, líklega hundruð manna.

Fjöldi munka var tekinn úr klaustrum og ekkert hefur til þeirra spurst.