Flóahreppur hafnar Urriðafossvirkjun

Sveitarstjórn Flóahrepps gerir ekki ráð fyrir Urriðafossvirkjun í drögum að aðalskipulagi. Virkjunin nær til þriggja sveitarfélaga; Ásahrepps, Skeiða- og Gnúpverjahrepps og Flóahrepps, sem verða öll að samþykkja byggingu virkjunarinnar á aðalskipulagi sínu til að af framkvæmdum geti orðið. Landsvirkjun undrast niðurstöðuna og munu fulltrúar fyrirtækisins funda með sveitarstjórnarmönnum í dag.

„Við vonumst til þess að ná samkomulagi um að hafa virkjunina inni á skipulaginu", segir Þorsteinn Hilmarsson, upplýsingafulltrúi Landsvirkjunar.

Þorsteinn segir ákvörðun sveitar­stjórnarinnar koma verulega á óvart. „Þó Urriðafossvirkjun sé ekki ein af stærstu virkjunum sem byggðar hafa verið á Íslandi skiptir þetta verulega miklu máli fyrir Landsvirkjun og þá uppbyggingu sem framundan er í orkumálum. Auðvitað er þetta mjög óheppilegt og við vonumst til þess að menn nái samkomulagi um það að hafa þetta inn á skipulaginu."

Aðalsteinn Sveinsson, oddviti Flóahrepps, segir að sveitar­stjórnin hafi farið yfir rökin með og á móti virkjun að undanförnu. „Það er ljóst að það er mikill fórnarkostnaður að byggja þessa virkjun, þó að hægt sé að finna ýmsa kosti einnig. Okkar niðurstaða var einfaldlega sú að rökin gegn virkjun vegi þyngra en þau sem mæla með byggingu hennar." Í bókun sveitarstjórnar segir að meginástæða þess að sveitarstjórn telji ekki nægilegan ávinning af virkjuninni fyrir Flóahrepp og íbúa hans sé að nægjanlegar bætur fáist ekki fyrir áhrif virkjunar „á vatnsverndarsvæði, ferðaþjónustu, lífríki í Þjórsá og landnotkun í nágrenni virkjunarinnar".

Aðalskipulagsdrögin verða lögð fyrir íbúafund 25. júní og tillagan síðan auglýst. „Tillagan getur tekið breytingum í kjölfar fundarins," segir Aðalsteinn. Eftir að auglýsingin hefur verið birt tekur við lögformlegt kynningarferli aðalskipulagsins. Urriðafossvirkjun er stærst þeirra þriggja virkjana sem Landsvirkjun hefur ráðgert að byggja í neðri hluta Þjórsár. Henni er ætlað að framleiða 125 megavött, sem eru um tíu prósent af uppsettu afli Landsvirkjunar í dag. Til samanburðar mun Kárahnjúkavirkjun framleiða 700 megavött.

Þorsteinn minnir á að tvö sveitar­félög af þrem geri ráð fyrir Urriðafossvirkjun í aðalskipulagi sínu. „Þegar ósamræmi er í aðalskipulagi sveitarfélaga á þennan hátt er það Skipulagsstofnun ríkisins sem skipar samráðsnefnd til að ná samhæfðri niðurstöðu."