Fangar taka yfir rammgirt fangelsi

Mörg hundruð fangar hafa tekið völdin í tveimur álmum í einu rammgirtasta fangelsi Afganistans. Þar eru tæplega tvö þúsund fangar í haldi nú og stefnt að því að flytja um hundrað meinta hryðjuverkamenn þangað úr Guantanamo-fangelsinu á Kúbu.

Nokkrir fangar í hinu óárennielga Pulecharkhi fangelsi í höfuðborginni Kabúl, reyndu að flýja í gær en varð ekki kápan úr því klæðinu því fangavörðum tókst að koma í veg fyrir þá fyrirætlan. Þá sáu umræddir fangar engin önnur ráð en að taka völdin á bak við rimlana, fengu enn fleiri fanga í lið með sér og saman ráku þeir fangaverðina á flótta úr kvennaálmu fangelsisins. Tveir kvennkyns fangaverðir munu þó vera í haldi glæpamannanna.

Fangarnir sem skipulögðu flóttann munu hafa verið í haldi í þeirri álmu þar sem talibanar og al-Qaida liðar eru í haldi í bland við aðra ótýnda glæpamenn.

Heimildarmenn breska ríkisútvarpsins, BBC, halda því fram að til blóðugra átaka hafi komið í morgun og minnst sjö hafi látið lífið. Þessu neita yfirvöld. Vitni segja mikla skothríð hafa heyrst innan veggja fangelsisins í dag. Að minnsta kosti tuttugu lögreglubílar og tveir sjúkrabílar eru á vettvangi auk fjölmargra hermanna.

Þegar leið á dáginn tóku hátt í 800 fangar í annarri álmu völdin þar og hófu að brenna húsgögn og annað lauslegt til stuðnings þeim sem halda til í kvennaálmunni.