Óttast var að ræningjarnir hefðu skilið eftir sprengju

Lögreglan í Svíþjóð tók til þess ráðs í dag að rýma stóran hluta annars stærsta flugvallar Svíþjóðar eftir að grunsamlegur pakki fannst eftir vopnað rán á flugvellinum.

Sænska lögreglan leitar nú að þremur mönnum sem komust undan eftir að hafa rænt peningum sem verið var að flytja úr flugvél SAS flugfélagsins í öryggisbíl. Ránið varð á Landvetter sem er alþjóðaflugvöllurinn í Gautaborg en þjófarnir óku á jeppa sínum í gegnum hlið við flugvöllinn. Þegar þeir óku á brott skildu þeir eftir torkennilegan pakka en óttast var í fyrstu að um sprengju væri að ræða. Farþegar voru enn um borð í flugvélinni þegar ránið varð. Margir sáu mest alla atburðarásina í gegnum glugga flugvélarinnar og greip nokkur skelfing um sig meðal þeirra þegar grímuklæddir menn nálguðust vélina. Hluti flugvallarins var strax rýmdur af ótta við að sprengja hefði verið skilin eftir.

Þjófarnir dreifðu nöglum á göturnar þegar þeir óku burt en bíll þeirra fannst nokkra kílómetra frá flugvellinum mikið skemmdur eftir að kveikt hafði verið í honum. Talið er að ræningjarnir hafi þar skipt um bíl en sá bíll fannst nokkrum kílómetrum lengra ónýtur eftir að kveikt var í honum. Lögreglan leitar enn mannanna en ekkert hefur verið gefið út um hversu mikið fé þjófarnir höfðu á brott.